दर्शण देता जाइजो जी, सतगुरु मिळता जाइजो जी ।
म्हारे पीवरिया री बातां थोड़ी म्हने, केहता जाइजो जी ।
सोने जेड़ी पीली पड़ गई, दुनियाँ बतावे रोग ।
रोग दोग म्हारे काँई नी लागे, गुरु मिलण रो जोग ।।
दर्शण देता जाइजो जी, सतगुरु मिळता जाइजो जी ।
म्हारे पीवरिया री बातां थोड़ी म्हने, केहता जाइजो जी ।।
* म्हारे भाभे म्हने बींद बतायो, पकड़ बताई बाँह ।
काँई कहो मैं काँई न समझें, जीव भजन रे माँय ।।
दर्शण देता जाइजो जी, सतगुरु मिळता जाइजो जी।
म्हारे पीवरिया री बातां थोड़ी म्हने, केहता जाइजो जी ।।
* म्हारे देश रा लोग भला है, पेहरे कंठी माला ।
म्हारा लागे वे भाई-भतीजा, राणाजी रा साळा ।
दर्शण देता जाइजो जी, सतगुरु मिळता जाइजो जी।
म्हारे पीवरिया री बाता थोड़ी म्हने, केहता जाइजो जी
सासरियो संसार छोड़ियो, पीव ही लागे प्यारो ।
बाई रे मीरां ने गिरधर मिलियो, चरण कमल लिपटायो
दर्शण देता जाइजो जी, सतगुरु मिळता जाइजो जी।
म्हारे पीवरिया री बातां थोड़ी म्हने, केहता जाइजो जी ।।