By sanatanjiwan.com बिना निवण कुण तिरिया…..
दोहा :
निवण बड़ी संसार में, और नहीं निवे सो नीच ।
निवे नदी रो गूंदलो, वो रेवे नदी रे बीच ।।
* निवे ज्यूं आम्बा आम्बली, निवे ज्यूं दाड़म दाख ।
इरण्ड बिचारा क्या निवे, ज्यारी ओछी कहिजे शाख ।
स्थाईः
आदु-आदु पंथ निवण पद मोटो, संगत संतों वाळी करिया
साधु भाई ! बिना निवण कुण तिरिया ।।
* मूळ रे कमल बिच चारों चौकी, गणपत आसन धरिया ।
आसण मार इदक होय बैठा, जाप अजम्पा जपिया
रे साधु भाई ! बिना निवण कुण तिरिया ॥
* पेलो निवण म्हारा मात-पिता ने, उत्तपुत पालन करिया ।
दूजो निवण इण धरती माता ने, जिण पर पगल्या धरिया
रे साधु भाई ! बिना निवण कुण तिरिया ॥
* तीजो निवण म्हारे गुरा पीरां ने, हृदये उजाळा करिया ।
चौथो निवण इण सत री संगत ने, जिण में आय सुधरिया
रे साधु भाई ! बिना निवण कुण तिरिया ।।
* निवण करूं म्हारा ज्योति सरूपी, होय इन्दर होलरिया ।
इमरत बूँदां बरसण लागी, मान सरोवर भरिया
रे साधु भाई ! बिना निवण कुण तिरिया ।
बिना पाळ भवसागर भरिया, गुरु शरणां में उबरिया ।
गुरु शरणे माळी लिखमो जी बोले, भूल भरम सब टळिया
रे साधु भाई ! बिना निवण कुण तिरिया ।